Síðasta messa Benedikts 16. í embætti páfa

Benedikt 16. páfi mun halda sína síðustu messu í dag sem páfi en um er að ræða hina árlegu öskudagsmessu hans.

Messan hefur verið færð í Péturskirkjuna af virðingarskyni við páfann og til þess að fleiri geti notið hennar en öskudagsmessa þessi hefur yfirleitt verið haldin í annari kirkju. Páfinn flytur stutt ávarp, fer með bæn og blessar síðan viðstadda.

Þá er búist við miklum mannfjölda á Péturstorginu fyrir hádegið þegar páfinn kemur fram opinberlega í glugga íbúðar sinnar við torgið eins og hann gerir ætíð á miðvikudögum þegar hann er staddur í Róm.