Konur og börn féllu í loftárás NATÓ

Yfirvöld í Afganistan lýstu því yfir í nótt að hátt í tíu óbreyttir borgarar hefðu fallið í loftárás Atlantshafsbandalagsins í austurhluta Afganistan, flestir konur og börn.

Talsmaður NATÓ sagði í dag að rannsókn á málinu stæði yfir. Að minnsta kosti þrír Talibanar féllu í árásinni en skæruliðarnir eru sagðir hafa tengsl við hryðjuverkasamtökin al-Qaeda.

Þá særðust fjögur börn til viðbótar í loftárásinni.

Mannfall meðal almennra borgara er afar viðkvæmt mál hjá NATÓ og hefur Hamid Karzai, forseti Afganistan, margsinnis þurft að fordæma aðgerðir Atlantshafsbandalagsins í landinu.

Karzai hefur oft á tíðum sagt að hið svokallaða stríð gegn hryðjuverkum eigi ekki að fara fram í afgönskum þorpum.

Málið kemur hins vegar upp á allra versta tíma fyrir NATÓ. Barack Obama, Bandaríkjaforseti, tilkynnti í stefnuræði sinni í gær að Bandaríkin og NATÓ myndu fækka verulega í herliði sínu í Afganistan á næsta ári.