Handtóku saklausan mann, áfram mikil öryggisgæsla við Stórþingið

Maðurinn sem lögreglan í Osló handtók í nótt reyndist saklaus af því að hafa hótað að sprengja hús Stórþingsins í loft upp. Hann var látin laus úr haldi fyrir stundu.

Lögreglan í Osló leitar því enn að sprengjumanninum en vitni segja að hann hafi verið klæddur skotheldu vesti og með þungan poka í fórum sínum.

Í norskum fjölmiðlum kemur fram að hús Stórþingsins sé enn umkringt af lögreglumönnum og gífurleg öryggisgæsla er í grennd við húsið.

Eins og fram kom í frétt okkar í morgun hófst mál þetta í gærkvöldi þegar hinn meinti sprengjumaður sást í strætisvagni þar sem hann hafði uppi háværar hótanir um að sprengja Stórþingshúsið.