Hvað eru margir kaþólikkar í heiminum?

Meira en fjörutíu prósent af kaþólikkum í heiminum búa í Mið- og Suður-Ameríku en mest fjölgun undanfarin ár hefur verið í Afríku. Þetta kemur fram í úttekt fréttavefs BBC um kaþólikka.

Samkvæmt tölum frá Vatíkaninu er um 1,2 milljarður manna í heiminum sem er kaþólskrar trúar. Um 483 milljónir þeirra búa í Mið- og Suður-Ameríku sem svarar til rúmlega 41% kaþólikka í heiminum. Flestir búa í Brasilíu eða 150 milljón kaþólikka.

Heimsálfurnar

Mið- og Suður-Ameríka 483 milljónir (41,3%)

Evrópa 277 milljónir (23,7%)

Afríka 177 milljónir (15,2%)

Asía 137 milljónir (11,7%)

Norður-Ameríka 85 milljónir (7,3%)

Eyjaálfa 9 milljónir (0,8%)

Flestir kaþólikkar í Evrópu búa á Ítalíu (57 milljónir) en Lýðveldið Kongó hefur flestum kaþólikkum á að skipa þegar litið er til Afríku (36 milljónir).

Kaþólikkar sækja í suður

Frá árinu 1970 hafa kaþólikkum farið fækkandi í norðri en fjölgað í suðri. Þannig hefur hlutfall kaþólikka í Evrópu lækkað úr 38,5% í 23,7%. Á sama tíma hefur hlutfall kaþólikka í Afríku aukist um 15,2% og í Asíu um 12%.

Kosning kardinálanna

118 kardinálar hafa atkvæðisrétt í páfakjörinu sem reiknað er með að fari fram upp úr miðjum mars. A.m.k. tveir þeirra verða orðnir áttræðir þegar að kjörinu kemur og verða af þeim sökum ekki gjaldgengir. Rúmlega helmingur kardinálanna var kjörinn í páfatíð Benedikts sextánda.

Kardinálar eftir heimsálfum

Evrópa 62

Mið- og Suður-Ameríka 19

Norður-Ameríka 14

Afríka 11

Asía 11

Eyjaálfa 1

Samkvæmt lögum kaþólsku kirkjunnar geta allir sem skírðir eru innan kaþólsku kirkjunnar verið kjörnir páfar. Þó hefur páfinn komið úr röðum kardinálanna síðustu 600 árin.

Umfjöllun BBC um málið má sjá hér.