Hátt í 100.000 höfrungar safnast saman fyrir utan San Diego

Hátt í 100.000 höfrungar hafa safnast saman í hafinu undan ströndum San Diego í Bandaríkjunum á síðustu dögum.

Það voru gestir um borð í hvalaskoðunarbátum sem fyrst tóku eftir því að höfrungar voru að flykkjast inn á þetta hafsvæði fyrir síðustu helgi.

Bandarískir fjölmiðlar á vesturströnd landsins eru byrjaðir að fjalla um þetta náttúrufyrirbæri en vísindamenn hafa ekki neinar einhlítar skýringar á því. Ekki er vitað til áður í sögunni að svo mikill fjöldi höfrunga hafi safnast saman á jafnlitlu svæði. Það eru til dæmi um stórar vöður af höfrungum áður á þessum slóðum en ekkert í líkingu við þessa.

Sjónarvottar segja að þessi höfrungavaða sé um 11 kílómetrar að lengd og 8 kílómetrar að breidd. Undir eðlilegum kringumstæðum ferðast höfrungar saman í vöðum sem telja um 200 dýr.

Los Angeles Times fjallar um málið á vefsíðu sinni. Þar eru viðtöl við reynda hvalaskoðunarmenn á þessum slóðum sem segja að þeir hafi aldrei séð annað eins.

Einn þeirra, Dave Anderson, sem er skipstjóri á hvalaskoðunarskipi segir að upplifunin að fylgjast með þessari risavöxnu vöðu af höfrungum sé stórkotslegasta sjónin á allri ævi sinni.