Kolbeinn byrjaði í sigri Ajax

Kolbeinn Sigþórsson var í fyrsta sinn í byrjunarliði Ajax síðan hann meiddist á Laugardalsvelli þegar Ísland og Króatía gerðu markalaust jafntefli í nóvember. Kolbeinn átti þátt í fyrra marki Ajax sem lagði Cambuur 2-1 á útivelli.

Ajax féll út úr Meistaradeildinni í vikuni og það virtist hafa þó nokkur áhrif á leik liðsins því liðið náði sér ekki á strik í leiknum.

Ajax fékk sitt fyrsta færi gegn nýliðum Cambuur á 40. mínútu þegar Kolbeinn átti frábæra sendingu á Davy Klaassen sem gaf fyrir á Lasse Schöne sem skoraði með góðu skoti.

Þrátt fyrir að vera mikið meira með boltann gekk lítið sóknarlega hjá Ajax og þegar skammt var eftir fór Cambuur að pressa eftir jöfnunarmarki sem kom þegar Michiel Hemmen jafnaði á 82. mínútu með sínu sjöunda marki á leiktíðinni.

Cambuur var líklegra til að skora sigurmark þar til Marcel Ritzmaier fékk að líta sitt annað gula spjald í upphafi uppbótartímans.

Ajax nýtti sér liðsmuninn frábærlega því Davy Klaassen tryggði Ajax sigurinn á 92. mínútu eftir stórsókn Ajax.

Ajax komst á topp deildarinnar með sigri en Vitesse getur aftur komist á toppinn vinni liðið leikinn sem liðið á til góða síðar í dag. Cambuur er í næst neðsta sæti deildarinnar, stigi á undan NEC.