Smástirni þaut milli jarðar og tungls í gær

Rúmlega 45 metra smástirni þaut á milli jarðar og tungls í gær. Vísindamenn uppgötvuðu smástirnið fyrir aðeins tveimur vikum.

Smástirnið er kallað 2012 EG5. Á tímabili var EG5 í rétt rúmlega 230.000 kílómetra fjarlægð frá jörðinni.

Aldrei var hætta á að EG5 myndi skella á jörðinni. Afleiðingarnar hefðu hins vegar orðið stórfelldar hefði smástirnið breytt um stefnu. Árekstur við slíkt smástirni hefði orsakað sprengingu sem svipað hefði til kjarnorkusprengingu.

Sérfræðingar NASA birtu upplýsingar um stefnu EG5 á samskiptasíðunni Twitter í gær. Þar var árekstur útilokaður.

Upp á síðkastið hafa vísindamenn NASA verið duglegir við að birta upplýsingar um smástirni sem nálgast jörðina. Með því vilja þeir blása á allar samsæriskenningar um heimsenda á þessu ári.

Jörðin hefur þó auðvitað átt náin kynni við stærðarinnar smástirni. Fyrir 65 milljón árum skall tíu kílómetra smástirni á jörðinni og batt enda á dvöl risaeðlanna á plánetunni.