Sandy hefur áhrif á kosningabaráttuna

Fellibylurinn Sandy hefur sett kosningabaráttu forstaframbjóðendanna í Bandaríkjunum úr skorðum. Talið er að fellibylurinn komi að landi á morgun og geti haft víðtæk áhrif um alla austurströnd Bandaríkjanna en íbúum er sagt að búa sig undir jafnvel margra daga rafmagnsleysi.

Fellibylurinn kostaði sextíu manns lífið á ferð sinni yfir Jamaíku, Kúbu og Bahamaeyjar í síðustu viku en gríðarlegt úrhelli og vindhraði í kringum 40 metra á sekúndu fylgir storminum. Sandy nálgast nú austurströnd bandaríkjanna og búist við að hann nái landi á morgun við Delaware. Þá eru tvær öflugar vetrarlægðir einnig á sama svæði og er því von á aftakaveðri á austurströndinni í byrjun næstu viku sem bandarískir miðlar kalla Frankenstorm en Hrekkjavökuhátíðin er haldin hátíðleg í byrjun næstu viku.

Búist er viðð allt að þrjátíu sentimetra rigningu og sextíu sentimetra snjókomu. Sérfræðingar á vegum fox fréttastofunnar telja að stormurinn geti verið mun sterkari en fellibylurinn Irene sem olli meira en 15 milljarða dollara skemmdum á síðasta ári.

Neyðarástandi hefur verið lýst yfir í sex ríkjum, þar á meðal New York og Virginíu og hafa stjórnvöld þessarra ríkja sagt íbúum að gera viðeigandi ráðstafanir og undirbúa sig undir rafmagnsleysi í marga daga.

Ríkisstjóri í Connecticut segir að fólk þurfa að búa sig undir mikil flóð og mögulega versta storm í yfir þrjátíu ár.

Forsetaframbjóðendurnir Mitt Romney og Barack Obama hafa þurft að gera breytingar á kosningaherferð sinni vegna Sandy en einungis tíu dagar eru til kosninga en mörg af lykilríkjum í kosningabaráttunni eru einmitt á austurströndinni þar sem veðrið verður hvað verst.