Íslenskum læknanemum í Ungverjalandi hefur fjölgað gríðarlega

Íslenskum læknanemum í Ungverjalandi hefur fjölgað um hundrað og áttatíu prósent á sjö árum. Námið er sambærilegt og jafngilt því sem kennt er hér heima, segir ung kona sem hefur lagt stund á fræðin í báðum löndum.

Eftir að hafa þreytt inntökupróf í læknisfræði hér á landi í tvígang án þess að komast inn ákvað Helga María Alfreðsdóttir að hefja nám við alþjóðlega læknaháskólanum í Debrecen árið 2006.

„Það er auðveldara að komast inn úti en á móti kemur að fyrsta árið er rosalega strembið úti það er sían í rauninni," segir Helga María.

Námið ytra kostar tæpar tvær milljónir á ári en samkvæmt upplýsingum frá LÍN fjölgar íslenskum nemendum þar ört. Helga stundaði á sínum tíma nám ásamt um 30 öðrum Íslendingum hið minnsta, en það ár fóru flestir til Danmerkur. Dæmið hefur nú hins vegar algjörlega snúist við.

„Flestir eru að fara út vegna þess hvað það er erfitt að komast inn hérna heima en auðvitað eru einhverjir sem vilja fara út og læra úti," segir Helga María.

Helga María flutti aftur til Íslands eftir að hafa klárað fyrsta árið í Ungverjalandi þar sem hún átti von á barni en hún ákvað eftir barnsburð að taka inntökuprófið hér á landi á ný og komst inn.

„Þetta er sama námið í sitthvoru landinu. Sambærilegt og jafngilt, ég vil leiðrétta það fyrir þá sem halda eitthvað annað," segir María. „Fyrst þegar ég var að ströggla við að komast inn heima og komst ekki inn þá var ég náttúrulega mjög fúl eins og margir og skellti mér til Ungverjalands af illri nauðsyn. En þegar ég var komin þarna út þá var ég eiginlega bara rosalega fegin. Ég hefði misst af þessari reynslu ef ég hefði komist inn hérna heima strax."