Fellibylurinn Sandy lamar New York borg

Gífurlegur viðbúnaður er á austurströnd Bandaríkjanna vegna komu fellibylsins Sandy. Nú er reiknað með að Sandy nái landi í New Jersey síðdegis í dag.

Hundruð þúsunda manna hafa flúið frá þeim strandsvæðum sem talið er að fellibylurinn fari yfir. Áætlað er að allt að 60 milljónir manna geti orðið fyrir barðinu á Sandy vegna flóða, rafmagnsleysis og skemmda á híbýlum.

Í New York borg munu allar opinberar samgöngur, þar á meðal neðanjarðarlestakerfið, liggja niðri í dag, flugvellir verða lokaðir og stjórn kauphallarinnar hefur tilkynnt að markaðurinn í New York verði lokaður í dag og sennilega einnig á morgun.

Þá hefur Barack Obama Bandaríkjaforseti hvatt íbúa á austurströndinni að taka fellibylinn alvarlega og að fara eftir þeim ráðum og leiðbeiningum sem yfirvöld hafa gefið út.

Talið er að þegar Sandy nær til New York geti ölduhæðin við Manhattan orðið allt að 11 metrar. Þetta skýrist af því að Sandy mun sameinast öflugum kuldaskilum áður en fellibylurinn nær landi og mynda svokallaðan ofurstorm. Þar spilar inn í að fullt tungl verður í kvöld sem eykur ölduhæðina.