Sjálfboðaliðar leita Sigrid í dag

Rúm vika er síðan hin sextán ára gamla Sigrid hvarf sporlaust, steinsnar frá heimili sínu í Ósló. Hennar er nú leitað á alþjóðlegum vettvangi en grunur leikur á að hún hafi verið numin á brott þegar hún var á leið heim til sín aðfaranótt sunnudags.

Eigur hennar fundust nokkur hundruð metra frá heimili hennar í síðustu viku. Um er að ræða skó, sokk og farsíma og hefur lögreglan staðfest að um eigur Sigridar er að ræða. Lögreglan vonast til að getað notað upplýsingar úr farsímanum til að varpa á ljósi á mannránið.

Hátt í fjögur hundruð lögreglumenn og sjálfboðaliðar leituðu Sigridar í gær en sem fyrr bar leitin ekki árangur. Leit verður þó haldið áfram í dag. Síðustu daga hefur leit farið fram við Svartaskóg í Oppegård. Sjálfboðaliðar hafa blásið til leitar í dag og munu þeir hittast við Østensjø skólann í Ósló klukkan hálf þrjú í dag.

Samskiptamiðillinn Facebook hefur loks komið til móts við lögregluyfirvöld í Noregi og opnað fyrir reikning Sigridar. Í fyrstu voru stjórnendur síðunnar tregir við að birta persónuupplýsingar hennar. Ekki er vitað hvort að nýjar vísbendingar um hvarf Sigridar hafi fundist á Facebook-reikning hennar.

Lögreglunni í Ósló hefur borist rúmlega eitt þúsund vísbendingar frá almenningi. Hanne Kristin Rohde, lögregluvarðstjóri í Ósló, stjórnar aðgerðum. Hún ítrekað að allar ábendingar verði skoðaðar og að leit verði ekki hætt fyrr en hún ber árangur.