Verulega dregur úr starfsemi sómalskra sjóræningja

Verulega hefur dregið úr starfsemi sjóræningja undan ströndum Sómalíu það sem af er þessu ári miðað við sama tímabil í fyrra.

Á fyrstu níu mánuðum ársins hafa sómalskir sjóræningjar gert árásir á 70 skip undan ströndum landsins. Á sama tímabili í fyrra voru árásirnar orðnar 233 talsins.

Alþjóðasiglingamálastofnunin segir að þessi fækkun skýrist einkum af hinu alþjóðlega átaki sem gert hefur verið í til að halda þessum sjóræningjum í skefjum en herskip frá mörgum þjóðum vakta nú helstu siglingarleiðir undan ströndum Sómalíu.

Á sama tíma hefur sjóránum fjölgað undan vesturströnd Afríku og er nígeríski flotinn farinn að vakta Gíneuflóann vegna þeirra. Hafsvæðin undan ströndum Benin og Togo eru einnig talin hættuleg. Á þessum slóðum eru sjóræningjarnir einkum á höttunum eftir olíuflutningaskipum enda auðvelt að selja farma þeirra.

Í frétt á vefsíðu BBC segir að þótt dregið hafi verulega úr sjóránum Sómala eru þar enn 11 skip í haldi ásamt 167 manns úr áhöfnum þeirra. Sumir af þessum skipverjum hafa dvalið í yfir tvö ár í haldi sjóræningja.