Sjórán vaxandi vandamál við vesturströnd Afríku

Bandaríska gáfnaveitan One Earth Future varar við vaxandi sjóræningjastarfsemi undan ströndum Vestur-Afríku.

Hingað til hefur sjóræningjastarfssemi í álfunni aðallega verið bundin við Sómalíu og hafsvæðið undan Horni Afríku. Á síðasta ári létu sjóræningjar einnig til sín taka undan vesturströnd Afríku. Raunar í svo miklum mæli að Lloyds tryggingarfélagið ákvað í ágúst s.l. að skilgreina siglingarleiðir þar sem stríðssvæði fyrir flutningaskip.

Gáfnaveitan bendir á að árið 2010 var ekki tilkynnt um neitt sjórán á þessum slóðum. Í fyrra var hinsvegar var átta skipum rænt, ráðist á tíu önnur og þeim haldið þar til lausnargjald var greitt en tvær árásir í Benin flóanum mistókust. One Earth Future telur að aðeins 40% af ránunum séu tilkynnt.

Gáfnaveitan hefur áhyggjur af áhrifum þessarar þróunar á olíumarkaðinn. Um svæðið fara nær allir olíuflutningar frá Nígeríu og fleiri Vestur Afríku löndum. Nígería framleiðir hátt í þrjár milljónir tunna af olíu á dag eða álíka mikið og Norðmenn og er sjötti stærsti útflytjandi olíu í heiminum.