Sara Björk: Ég vil bara vinna þær

Sara Björk Gunnarsdóttir, miðjumaður íslenska landsliðsins, ætlar sér meira en jafntefli á móti Noregi á Ullevaal-leikvanginum í Osló í dag en þetta er lokaleikur liðanna í undankeppni EM 2013. Íslenska liðinu nægir hinsvegar jafntefli til þess að tryggja sér farseðillinn á Evrópumótið í Svíþjóð næsta sumar.

„Það er rosalega mikil spenna í öllum. Við vitum allar hversu mikilvægur þessi leikur er og við munum koma rétt stemmdar í leikinn það er alveg klárt," segir Sara Björk.

„Það skipti öllum máli fyrir okkur að vinna leikinn á móti Norður-Írlandi og tryggja okkur umspil. Nú ætlum við bara einbeita sér að þessum leik og það eru allar rosalega tilbúnar í þennan leik. Við ætlum allar að leggja okkur hundrað prósent fram og fara á EM," segir Sara en íslensku stelpurnar geta tryggt sig inn á annað Evrópumótið í röð.

Sara átti frábæran leik þegar íslenska liðið vann 3-1 sigur á Noregi í fyrri leiknum á Laugardalsvellinum fyrir ári síðan.

„Við spiluðum frábærlega í fyrri leiknum og kláruðum hann eiginlega í fyrri hálfleik. Við vörðumst vel í seinni hálfeik og beittum skyndisóknum sem við þurfum að gera líka vel á morgun. Þetta er bara úrslitaleikur og þær eru á heimavelli. Þetta mun samt bara snúast um það hvaða lið vill þetta meira. Ég vona að allir leikmenn í okkar liði vilji þetta meira en þær," sagði Sara.

„Við munum ekki einblína á öryggisnetið heldur að ná þessum þremur stigum. Ég veit að okkur nægir jafntefli en mig langar ekkert að gera eitthvað jafntefli. Ég vil bara vinna þær. Við höfum sýnt það oft og í mörgum leikjum að við eigum heima á þessum stórmótum. Við ætlum að sýna það aftur á morgun," sagði Sara Björk: