Birtu myndir af líki Whitney Houston - aðdáendur æfir

Bandaríska slúðurblaðið the National Enquirer hefur gert aðdáendur poppstjörnunnar Whitney Houston vægast sagt brjálaða en í nýjasta tölublaðinu er mynd af líki söngkonunnar á forsíðu. Á myndinni sést Whitney í líkkistu sinni en talið er að hún hafi verið tekin þegar nánasta fjölskylda hennar fékk að líta hana augum í hinsta sinn. Ekki er vitað hver tók myndina.

Í blaðinu er einnig greint frá því í smáatriðum hvernig Whitney var klædd í kistunni. Hún mun hafa verið klædd í uppáhaldskjólinn sinn. Þá mun hún hafa verið með skartgripi að verðmæti um 60 milljóna króna og í gullslegnum skóm.

Þetta er ekki í fyrsta sinn sem blaðið birtir myndir af látnum stjörnum, því hið sama gerði það árið 1977 þegar Elvis Presley var borinn til grafar, og einnig þremur árum síðar þegar John Lennon var jarðaður.