Maður beit bíl í Flórída

Karlmaður í Flórída í Bandaríkjunum beit lögreglubíl eftir að hafa verið handtekinn fyrir óspektir á almannafæri. Talið er að maðurinn hafi verið undir áhrifum baðsalts.

Hinn 47 ára gamli Eric Scott hafði ítrekað bankað upp hjá nágrönnum sínum og beðið þá um hringja á sjúkrabíl fyrir sig. Þegar lögreglan kom loks á staðinn gekk Scott í burtu frá þeim og talaði við sjálfan sig.

Samkvæmt lögreglunni í Flórída var Scott alblóðugur og er talið að áverkarnir hafi verið af hans eigin völdum.

Scott var handsamaður og hringdu lögreglumennirnir á sjúkrabíl. Á meðan beðið var eftir sjúkrabílnum lá Scott handjárnaður á húddi lögreglubílsins. Eftir stutta stund sökkti Scott tönnum sínum í bílinn.

Eins og áður segir er talið að Scott hafi verið undir áhrifum baðsalts. Samkvæmt lögreglunni í Flórída var hegðun Scotts reikul og ruglingsleg. Að auki var hann afar fjandsamlegur í garð lögreglunnar.

Þessi tiltekna gerð af balsalti hefur verið bönnuð í Bandaríkjunum en töluvert hefur borið á misnotkun þess á síðustu árum.