Lögreglan skaut tugi námuverkamanna

Suður-Afríka, AP„Lögregla, hættu að skjóta eiginmenn okkar og syni“ stóð á spjaldi sem eiginkonur námuverkamanna í Suður-Afríku báru í gær.

Þær efndu til mótmæla eftir að tugir námuverkamanna höfðu látið lífið í átökum við lögregluna utan við Lonmin-platínunámuna, sem er skammt frá bænum Marikana.

Átökin hófust á föstudaginn fyrir viku, eftir að námuverkamennirnir fóru í verkfall til að krefjast betri kjara. Um tíu námuverkamenn höfðu fallið í átökunum fram á miðvikudag, en þá gripu lögreglumenn til vopna og skutu 34 menn til bana, auk þess sem 78 særðust.

Blóðbaðið gekk fram af landsmönnum og Jacob Zuma forsætisráðherra hraðaði sér heim frá Mósambík, þar sem hann var staddur á ráðstefnu. Hann sagðist hneykslaður á þessu „tilgangslausa ofbeldi“ eins og hann orðaði það.

Námuverkamennirnir í Lonmin hafa búið við kröpp kjör, fengið lág laun og margir búið í hrörlegum kofum. Sum barna þeirra þjást af langvinnum sjúkdómum vegna mengunar frá leku skolpræsakerfi. - gb