Kallaður hinn egypski Stjáni blái

Kraftlyftingakappinn Mústafa Ismaíl frá Egyptalandi stendur í ströngu um þessar mundir en hann bíður þess að heyra frá forsvarsmönnum heimsmetabókar Guinness hvort risavaxnir upphandleggir hans fáist viðurkenndir sem heimsmet.

Ummál þeirra er um 79 sentímetrar, sem jafngildir mittismáli á grönnum karlmanni. Ismaíl, sem segist kallaður hinn egypski Stjáni blái, borðar gríðarlegt magn af mat til að byggja sig upp, en þó ekki spínat. Honum er legið á hálsi að hafa notað bellibrögð eða ólögleg efni til að ná þessu marki, en hann neitar því. Guinness er að rannsaka málið, en ekki er víst hvenær niðurstöðu er að vænta.