Árásir hertar á Gasaströnd

Loftárásir Ísraelshers á Gasaströnd höfðu kostað að minnsta kosti 15 manns lífið síðdegis í gær. Forseti Egyptalands fordæmir árásir Ísraela og boðar heimsókn sína til Gasa í dag. Palestínumenn halda áfram að skjóta flugskeytum yfir til Ísraels, meðal ann

Ísraelsher herti loftárásir sínar á Gasaströnd í gær og bjó sig undir að fara með herlið sitt yfir landamærin. Palestínumenn hafa svarað með því að halda áfram að skjóta flugskeytum yfir til Ísraels.

Árásir Palestínumanna kostuðu að minnsta kosti þrjá Ísraela lífið, en árásir Ísraela höfðu síðdegis í gær kostað að minnsta kosti 15 Palestínumenn lífið. Á annað hundrað manns særðust.

Palestínumenn sögðust hafa skotið flugskeytum á Tel Avív, næst stærstu borg landsins. Ísraelar segja þær sprengjur engu tjóni hafa valdið.

Ísraelski herinn sagðist síðdegis í gær hafa varpað sprengjum á 250 skotmörk á Gasaströnd frá því árásirnar hófust nærri hálfum öðrum sólarhring fyrr.

Jafnframt fullyrðir Ísraelsher að Palestínumenn hafi skotið 274 sprengjuflaugum yfir landamærin til Ísraels. Tekist hafi að skjóta 105 þeirra niður með sprengjuvarnarkerfi sem Bandaríkjamenn aðstoðuðu Ísraelsmenn við að koma upp.

Átökin eru þau hörðustu í fjögur ár. Ísraelar segjast vera í fullum rétti til að verja sig gegn sprengjuflaugum frá Gasasvæðinu, sem hafi skipt hundruðum á þessu ári.

„Það er mikilvægt að átta sig á einföldu atriði: Það er ekkert siðferðilegt jafnræði með hryðjuverkamönnum á Gasa og Ísraelum,“ sagði Benjamín Netanjahú, forsætisráðherra Ísraels: „Þeir eru að fremja tvöfalda stríðsglæpi: Þeir skjóta á almenna borgara í Ísrael, og fela sig á bak við almenna palestínska borgara.“

Mohammed Morsi, forseti Egyptalands, fordæmdi í gær árásirnar og boðaði jafnframt heimsókn sína til Gasastrandar í dag. Hann lýsti yfir stuðningi við Palestínumenn á Gasa, en forðaðist þó að hafa hörð orð um Ísraela og sagðist hafa rætt við Barack Obama Bandaríkjaforseta um að hægt væri að „koma á friði og öryggi fyrir alla án hernaðarátaka“.

Bandaríkjastjórn fordæmir hins vegar Hamas fyrir að skjóta flaugum á Ísraela. Bandaríkjamenn hafa, eins og Evrópusambandið, litið á Hamas-samtökin sem hryðjuverkasamtök og viðurkenna ekki stjórn þeirra á Gasaströnd.gudsteinn@frettabladid.is