Greiðslu úr neyðarsjóði frestað

Fjármálaráðherrar Evrópusambandsins hafa samþykkt að Grikkir fái frest til ársins 2016, eða tveimur árum lengur en áður hafði verið krafist, til þess að gera nauðsynlegar ráðstafanir í efnahagsmálum svo hægt verði að hefjast handa við að draga úr skuldabyrði gríska ríkisins.

Hins vegar var ákvörðun frestað um næstu greiðslu til Grikkja úr neyðarsjóðum ESB og Alþjóðagjaldeyrissjóðsins.

Fjármálaráðherrarnir vilja einnig að Grikkir fái frest til ársins 2022 til þess að ná skuldum ríkisins niður í 120 prósent af landsframleiðslu.

Um þetta er hins vegar ágreiningur við AGS, sem vill halda sig við fyrri áætlun um að skuldirnar verði komnar niður í 120 prósent árið 2020.

Christine Lagarde, yfirmaður AGS, telur vænlegra að evruríkin samþykki að taka á sig eitthvað af skuldum Grikklands, en fjármálaráðherrarnir telja sig ekki geta sannfært kjósendur sína heima fyrir um að slíkt sé réttlætanlegt. Á fundi fjármálaráðherranna í Brussel þokuðust lítt áfram áform um að koma á bankabandalagi með sameiginlegu bankaeftirliti og innistæðutryggingum.- gb