Heilu hverfin á floti

„Ég var bara mjög heppin. Við erum enn með rafmagn og vatn en gamla íbúðin mín er komin þrjá metra undir vatn og gömlu vinnustaðirnir mínir eru á floti,“ segir Kristín Agnarsdóttir, grafískur hönnuður, sem búsett er í Williamsburg í New York.

Kristín segir að í fyrrakvöld hafi henni þótt viðbúnaður yfirvalda heldur mikill en þegar líða fór á kvöldið hafi hún áttað sig á vindstyrknum. „Þá sá ég að það var byrjað að flæða upp úr ræsunum og sá hvernig vindurinn var farinn að rífa í trén. Fólk gekk meðfram veggjum til að forðast vindinn. Síðan fóru múrsteinar að fjúka af húsum – það var eiginlega bara bilun að sjá hvað þessi vindur var sterkur,“ segir Kristín. „Núna eru allar brýr lokaðar og heilu hverfin á floti. Ég ætlaði að fara að labba inn í Manhattan en það má enginn fara inn – bara út.“

Þegar Fréttablaðið náði tali af Kristínu í gær var hún úti á gangi. „Vatnsyfirborðið er að lækka og ástandið versnar ekki héðan í frá. Nú verður farið í að koma rafmagni aftur á og bæta samgöngur.“