Hjólreiðamaðurinn var skotinn fyrst

Vitnisburður Zainab al-Hilli, sjö ára stúlku sem lifði af skotárás í Frakklandi, hefur breytt þeirri mynd sem franska lögreglan hafði gert sér af atburðarásinni. Svo virðist sem hjólreiðamaður, sem fannst látinn skammt frá bifreið fjölskyldu stúlkunnar, hafi fyrst verið skotinn.

Að því búnu hafi morðinginn beint vopni sínu að föður stúlkunnar, sem hafði séð það sem gerðist. Loks hafi hann snúið sér að öðrum úr fjölskyldunni sem sátu í bifreiðinni. Foreldrar stúlkunnar létu þar lífið ásamt ömmu hennar, en sjálf særðist hún illa af skotsári. Systir hennar, hin fjögurra ára gamla Zeena, lifði einnig af skotárásina með því að fela sig undir fótum móður sinnar í aftursæti bifreiðarinnar.

Svo virðist sem faðirinn, Saad al-Hilli, hafi verið fyrir utan bifreiðina ásamt eldri stúlkunni þegar skotið var á hjólreiðamanninn. Hann hafi síðan reynt að aka burt, en fest bílinn í gljúpum jarðvegi og þar af leiðandi hafi fjölskyldan ekki komist undan morðingjanum.

Með rannsókn á vettvangi hefur að sögn lögreglu tekist að staðfesta frásögn stúlkunnar.

Fjölskyldan bjó í Bretlandi en var á ferðalagi í Frönsku Ölpunum þegar morðinginn varð á vegi hennar.

- gb