Logi: Vil gera gott Stjörnulið enn betra

Logi Ólafsson verður áfram í Pepsi-deild karla næsta sumar þótt Selfyssingar hafi fallið á dögunum. Logi er hættur með Selfossliðið eftir tveggja ára starf og samdi við Stjörnuna í gær.

Logi segir þetta hafa borið skjótt að og að viðræður við forráðamenn Stjörnunnar hafi ekki tekið langan tíma. „Hugmyndir mínar og stjórnarinnar virtust fara vel saman og varð þá eftirleikurinn auðveldur og einfaldur," segir Logi. Stjarnan verður sjötta liðið sem Logi þjálfar í efstu deild og er hann þar með orðinn viðförulasti þjálfarinn í efstu deild karla í nútímafótbolta eða frá 1977.

Það eru liðin 22 ár síðan Logi fékk sitt fyrsta tækifæri sem þjálfari í efstu deild en hann tók við Víkingum fyrir sumarið 1990 þá 36 ára gamall. Logi hefur tekið sér reglulega hlé frá efstu deild því hann tók við kvennalandsliðinu, tvívegis við karlalandsliðinu og gerðist aðstoðarþjálfari hjá Lilleström í Noregi. Hann kemur hins vegar alltaf aftur í úrvalsdeildina og nú síðast eftir að hafa farið með Selfoss upp úr 1. deildinni.

„Ég finn ekki fyrir þreytu – alls ekki. Ferill minn hefur vissulega verið langur og það segir manni að ég sé kannski orðin svolítið gamall," sagði hann í léttum dúr. „En öll þau störf sem ég hef tekist á við hafa verið ánægjuleg og lærdómsrík. Og ég finn að ég hef enn metnað til að gera góð lið enn betri, eins og er tilfellið hjá Stjörnunni," segir Logi.

Jóhannes Atlason stýrði einnig sex liðum á sínum tíma en aðeins fimm þeirra eftir að deildin varð að tíu liða deild 1977. Fyrsta starf Jóhannesar var með lið ÍBA sumarið 1973. Ingi Björn Albertsson þjálfaði sitt fimmta lið í efstu deild þegar hann tók við Stjörnunni á miðju tímabili sumarið 1997 en hann hafði áður stýrt FH, Val, Breiðablik og Keflavík.

Bjarni Jóhannsson bættist í hópinn sumarið 2009 eftir að hafa farið með Stjörnuna upp úr 1. deildinni. Bjarni hafði áður þjálfað Breiðablik, ÍBV, Fylki og Grindavík í efstu deild.

Logi tekur nú við búinu af Bjarna en hann þekkir vel til í Garðabænum enda borinn þar og barnfæddur. „Það er auðvitað gaman að eiga þessi tengsl við félagið frá gömlu dögunum en hingað er ég kominn fyrst og fremst vegna þess að mér finnst liðið mjög gott og spennandi. Ég vil þó taka fram að ég tek við frábæru búi frá Bjarna Jóhannssyni en hann hefur gert margt mjög gott fyrir knattspyrnuna í Garðabæ."

Hann segir að varnarleikurinn standi helst fyrir þrifum. „Skemmtanagildi Stjörnunnar hefur verið í hávegum haft og vonandi getum við haldið áfram á þeirri braut. Helst þarf að laga varnarleikinn og ef Stjarnan ætlar að taka þátt í toppbaráttunni af alvöru þarf að huga að honum."

Nú tekur við skipulagning fyrir næsta tímabil og segir Logi að ætlunin sé að ræða við alla samningslausa leikmenn. „Eftir það verður skoðað hvort styrkja þurfi liðið enn frekar en það er einnig ljóst að ég mun líka nýta mér það góða starf sem hefur verið unnið í yngri flokkum Stjörnunnar enda virkilega góðir leikmenn að skila sér upp um þessar mundir."