Gríðarlegt mannfall í Sýrlandi og eyðilegging minja

Auk gríðarlegs mannfalls í átökum uppreisnarmanna og Sýrlandsstjórnar hafa óafturkræfar skemmdir orðið á heimsminjum í landinu. Um helgina logaði eldur í fornum útimarkaði innan borgarvirkisins í miðborg Aleppo, stærstu borg landsins. Markaðurinn sem enn er starfræktur er vinsæll ferðamannastaður og á heimsminjaskrá UNESCO.

Uppreisnarmenn í Aleppo hafa nýtt borgarvirkið sem miðstöð í baráttu sinni gegn stjórn Bashars al-Assad. Borgin byggðist upphaflega upp sem borgríki og þjónaði virkið þá varnartilgangi. Nú þjónar virkið svipuðum tilgangi fyrir uppreisnarmenn.

?Það er mikill missir og harmleikur sem fylgir því sem gerst hefur í Aleppo,? sagði Kishore Rao, stjórnandi UNESCO. Flestar þær minjar sem viðurkenndar eru af UNESCO hafa verið skemmdar í átökunum í Sýrlandi síðustu átján mánuði.

Myndbönd uppreisnarmanna á vefnum sýna uppreisnarmenn sprauta vatni á eldinn á meðan félagar þeirra reyna að halda hermönnum stjórnarinnar í skefjum. Sigur í Aleppo yrði hernaðarlega mjög mikilvægur fyrir báðar fylkingar í átökunum í Sýrlandi. Sigur uppreisnarmanna þar myndi veita þeim öfluga varðstöð nærri landamærum Sýrlands við Tyrkland. Borgin, undir hervaldi stjórnarhersins, mundi veita Assad mikilvægt olnbogarými. Borgarastríðið í Sýrlandi hefur nú þegar kostað yfir 30 þúsund manns lífið að sögn aðgerðarsinna.

Tyrkir og Egyptar hafa eflt stuðning sinn við uppreisnina. Mohammed Morsi, forseti Egyptalands, ásamt Recep Tayyip Erdogan, forsætisráðherra Tyrklands, segjast standa saman með íbúum Sýrlands og Palestínumönnum.

?Það er sameiginlegt markmið okkar að standa með þjóðum sem standa uppi í hárinu á stjórnvöldum; að standa með Palestínumönnum og Sýrlendingum,? sagði Mursi.

Erdogan biðlaði til Rússa, Kínverja og Írana um að hætta að styðja við bakið á stjórn Assads í Sýrlandi. ?Sagan mun ekki fyrirgefa þeim sem standa með miskunnarlausum stjórnvöldum,? sagði hann.

birgirh@frettabladid.is