Zuma hvetur til friðsemdar

Meira en þúsund manns komu saman á minningarathöfn um 34 námuverkamenn, sem féllu fyrir hendi lögreglumanna í síðustu viku.

Jacob Zuma, forseti landsins, tók ekki þátt í minningarathöfnunum. Hins vegar sendi hann frá sér yfirlýsingu þar sem hann hvatti landsmenn til þess að hætta að beita ofbeldi – svona almennt séð. Hann hefur boðað rannsókn á því sem gerðist.

„Ég vil ekki leggja dóm á þetta atvik,“ sagði í yfirlýsingunni. „Það gerir rannsóknardómnefndin.“

Á fimmtudaginn í síðustu viku létu 34 námuverkamenn lífið þegar lögreglan hóf skothríð á hóp manna sem tók þátt í verkfallsaðgerðum til að krefjast betri kjara fyrir námuverkamenn.

Vikuna þar á undan höfðu tíu manns látið lífið í átökum lögreglu og námuverkamanna, þar á meðal nokkrir lögreglumenn.

Verkalýðsfélag námu- og byggingarverkamanna krefst þess að óháð rannsóknarnefnd verði látin skoða hvað gerðist: „Við treystum ekki viðmiðunarskilmálum rannsóknarinnar, sem Zuma hefur boðað til,“ segir Jeff Mphahlele, framkvæmdastjóri verkalýðsfélagsins. - gb