Grikkir þurfa enn á ný meiri aðstoð

Seðlabanki Evrópusambandsins segir að það yrði öllum ríkjum Evrópusambandsins dýrkeypt ef Grikkir hrektust úr evrusamstarfinu. Þýskir ráðamenn þverneita enn að veita Grikkjum meira svigrúm til að ná endum saman.

Enn á ný þurfa Grikkir að biðja um meiri fjárhagsaðstoð til að ná endum saman í ríkisbúskapnum. Þýskir ráðamenn hafa tekið illa í slíkt og sagt Grikki fyrst þurfa að standa við sparnaðarloforð sín.

„Ég hef alltaf sagt að við getum hjálpað Grikkjum, en við getum ekki hent peningum í botnlausa hít,“ sagði til dæmis Wolfgang Schäuble, fjármálaráðherra Þýskalands, á laugardaginn.

Og Philip Rösler, sem er bæði efnahagsráðherra og aðstoðarkanslari Þýskalands, sagði nýverið að tilhugsunin um brotthvarf Grikklands af evrusvæðinu væri hætt að vera skelfileg.

Hins vegar sagði Jörg Asmussen, þýskur embættismaður í seðlabanka Evrópusambandsins, að brotthvarf Grikkja af evrusvæðinu yrði dýrkeypt, þó vissulega væri það viðráðanlegt.

„Því myndi fylgja minni hagvöxtur og meira atvinnuleysi, og það yrði mjög dýrt – í Grikklandi, í allri Evrópu og líka í Þýskalandi,“ sagði Asmussen.

Gríska ríkisstjórnin var í gær að ganga frá síðustu endunum í 11,6 milljarða evra sparnaðarpakka, sem þó dugar ekki til því enn vantar 2,5 milljarða evra til að standa straum af næstu stóru afborgunum lána, í viðbót við það sem áður var talið að þyrfti.

Megnið af sparnaðinum á að nást með því að lækka lífeyrisgreiðslur og velferðarbætur. Þetta yrði í fjórða sinn síðan 2010 sem gríska stjórnin lækkar greiðslur til lífeyrisþega, en þær hafa nú þegar verið lækkaðar um 40 prósent.

Þá stendur til að 34 þúsund ríkisstarfsmenn missi vinnuna, en í staðinn verða þeir skráðir í svokallað varavinnuafl, þar sem þeir fá greiddan hluta launa sinna í eitt eða tvö ár, eða þangað til þeim verður endanlega sagt upp.

Hvort Evrópusambandið og Alþjóðagjaldeyrissjóðurinn telja þetta duga kemur í ljós í næsta mánuði, þegar fulltrúar ESB, AGS og seðlabanka Evrópusambandsins gefa út mat sitt á frammistöðu grísku stjórnarinnar. Mat þeirra ræður úrslitum um það hvort Grikkir fá frekari fjárhagsaðstoð úr neyðarsjóðum ESB og frá AGS.

Antonis Samaras forsætisráðherra verður síðan á ferðalögum í Þýskalandi og Frakklandi í þessari viku, þar sem hann ætlar að reyna að sannfæra bæði Angelu Merkel Þýskalandskanslara og Francois Hollande Frakklandsforseta um að slá af ítrustu kröfum.

gudsteinn@frettabladid.is