Hærri fasteignagjöld renna til borgarinnar

Hærri fasteignagjöld sem Harpa greiðir skila Reykjavíkurborg hærri tekjum en áætlanir gerðu ráð fyrir. Pétur J. Þorsteinsson, stjórnarformaður Portusar, rekstrarfélags Hörpu, segir að áætlanir um reksturinn hefðu að mestu staðist ef ekki hefði komið til mun hærri fasteignagjalda.

Rekstraráætlanir gerðu ráð fyrir að fasteignagjöld yrðu aldrei hærri en 180 milljónir króna á ári, en Pétur segir þau vera um 380 milljónir. Fulltrúar Reykjavíkurborgar gerðu engar athugasemdir við áætlanir um lægri gjöld.

„Borgin hefur ekki gert athugasemdir um áætlanir okkar um lægri fasteignagjöld. Beinir skattar á okkur á þessu ári eru um 584 milljónir króna. Við erum að borga mun meira til þessara tveggja eigenda en sem nemur tapinu,“ segir Pétur, en gert er ráð fyrir að tap af rekstri Hörpu í ár nemi 407 milljónum króna.

Borgarráðsfulltrúar Samfylkingarinnar lögðu fram fyrirspurnir varðandi rekstraráætlanir Hörpu vorið 2010. Í svari Portusar og Austurhafnar, sem barst 21. apríl það ár, segir að gerðar hafi verið rekstraráætlanir með nokkurri nákvæmni fyrir árin 2010 til 2014.

„Framlög ríkis og borgar og hluti af leigu Sinfóníuhljómsveitar Íslands mun standa undir afborgunum og vöxtum af stofnkostnaði. Aðrar fastar leigutekjur (Íslenska óperan), breytilegar tekjur af viðburðum og ráðstefnum, rekstrarleyfissamningum, samstarfsverkefnum og bílastæðum munu standa undir rekstrarkostnaði. Stefna stjórnenda félaganna er að rekstur hússins verði sjálfbær og að ekki þurfi að koma til rekstrarstyrkja frá eigendum,“ segir í svarinu.

Engu að síður kemur fram að gert sé ráð fyrir því að auka þurfi hlutafé samstæðunnar um 580 milljónir króna. Hluti af því var í formi tækjabúnaðar frá Austurhöfn, sem metinn var á 75 milljónir króna. „Yrði þá framlag eigenda Austurhafnar vegna hlutafjáraukningarinnar 505 m.kr.“