Blóðbað stæði árum saman

„Jafnvel þótt þeir útveguðu sýrlensku uppreisnarmönnunum fullkomnasta vopnabúnað gætu þeir ekki sigrast á sýrlenska hernum,“ segir Sergei Lavrov, utanríkisráðherra Rússlands, um stuðning Vesturlanda og arabaríkja við uppreisnina í Sýrlandi.

„Blóðbaðið mun standa í mörg ár,“ bætti hann við.

Rússar hafa staðið gegn öllum hugmyndum um að styðja stjórnarandstöðuna í Sýrlandi með því að útvega henni vopn. Vesturlönd hafa ekki heldur stutt þær hugmyndir, en bæði Sádi-Arabía og Katar hafa talað fyrir því.

Um síðustu helgi samþykktu Vesturlönd engu að síður stofnun sjóðs, sem notaður yrði til að styrkja stjórnarandstöðuna í Sýrlandi, þótt það fé verði ekki notað til að útvega henni vopn.

Átökin í Sýrlandi héldu áfram í dag, meðal annars í borginni Homs þar sem á annan tug almennra borgara féllu í árásum stjórnarhersins.

Sýrlenska stjórnin hefur lofað því að kalla herlið sitt til baka frá borgum landsins fyrir 10. apríl, en uppreisnarmenn telja hana ætla að nota svigrúmið til að vinna endanlegan sigur.- gb