Rauða torginu í Moskvu lokað

Lögreglan í Rússlandi handtók í gær 55 mótmælendur, sem höfðu komið saman fyrir utan hlið Rauða torgsins í Moskvu til að mótmæla Vladimír Pútín og ríkisstjórn landsins. Rauða torginu var aldrei þessu vant lokað til þess að koma í veg fyrir mótmælin, þannig að ferðamenn komust ekki inn á torgið frekar en aðrir.

Um það bil 300 mótmælendur gripu þá til þess ráðs að koma saman fyrir utan hliðin og hófu á loft skilti með áletrunum á borð við „Þetta er okkar borg“, „Rússland fær frelsi“ og „Rússland án Pútíns“.

Sumir mótmælenda kröfðust þess að fá að fara inn á Rauða torgið en lögreglan smalaði þeim saman og skipaði þeim að fara í farþegavagna, sem biðu þess að flytja fólkið burt. Lítið hefur verið um mótmæli gegn Pútín síðan hann vann sigur í forsetakosningum í byrjun mars, en tugir þúsunda höfðu efnt til mótmæla gegn honum eftir þingkosningarnar, sem haldnar voru í desember.- gb