Á fjórða þúsund enn saknað í Japan

Efnt verður til bænastundar í Grensáskirkju á sunnudag í tilefni af því að eitt ár er liðið frá því að öflugur jarðskjálfti skók norðausturhluta Japan.

„Íslendingar hafa sýnt japönsku þjóðinni einstaka hlýju og stuðning sem gefur þeim kjark og von. Fyrir það erum við afar þakklát,“ segir Miyako Þórðarson, prestur heyrnarlausra. Ekki megi þó gleyma hörmungunum sem enn snerti marga og uppbygging á svæðinu sé fremur hæg.

Í upplýsingum frá japanska sendiráðinu kemur fram að á fjórða þúsund manns sé enn saknað og um 325.000 dvelji í bráðabirgðahúsnæði nú þegar ár er liðið frá jarðskjálftanum. Hann mældist 5,6 á Richter og orsakaði allt að 30 metra háa flóðbylgju sem náði mest 10 kílómetra inn í landið. Tala látinna er komin í 15.854.

Í kjölfar skjálftans urðu einnig alvarlegar bilanir í Fukushima-kjarnorkuverinu sem ollu töluverðri geislamengun.

Bænastundin, sem hefst klukkan 14, nefnist „Eitt ár er liðið“ og eru allir hjartanlega velkomnir.

- obþ