Tóku á sig afskriftir fyrir Grikki

Grikkland náði í gær mikilvægum áfanga í baráttunni við skuldavanda þegar lánadrottnar ríkissjóðs í einkageirunum samþykktu niðurfærslu og breytingu skulda.

Einkaaðilar, til dæmis bankar, lífeyrisjóðir og vogunarsjóðir, sem áttu samtals 177 milljarða evra inni hjá gríska ríkinu, höfðu frest til gærkvöldsins til að taka sjálfviljugir þátt í skuldbreytingingunni, sem felur í sér afskriftir á skuldum, lækkun vaxta og frestun afborgana. Skuldalækkunin er talin munu nema 107 milljörðum evra, að jafngildi 17.700 milljarða íslenskra króna.

Til þess að skuldbreytingin yrði að veruleika þurftu að minnsta kosti þrír fjórðu einkaaðilanna að samþykkja niðurfellingu síns hluta og sú varð raunin þó að ekki hafi legið fyrir í gærkvöldi hversu margir neituðu að taka þátt. Þetta hlutfall dugar til þess að gríska ríkið geti skuldbundið þau fyrirtæki til þátttöku.

Ekki eru þó allir á því að þessi aðgerð muni duga til, þar á meðal Peter Bofinger, aðstoðarmaður Angelu Merkel Þýskalandskanslara.

Hann segir í viðtali við Bloomberg fréttastofuna að skuldirnar verði Grikkjum áfram mjög erfiðar og næst muni önnur ríki og seðlabankar þurfa að fella niður hluta af skuldum gríska ríkisins.

„Og það þarf að gerast á næstu tólf mánuðum," sagði Bofinger.

- gb, þj