Obama segir ástandið of flókið

Bandarískir ráðamenn sjá ekki ástæðu til að hefja árásir á Sýrland, þrátt fyrir að aðgerðir sýrlenska hersins gegn mótmælendum og uppreisnarmönnum hafi kostað meira en átta þúsund manns lífið.

„Þetta er miklu flóknara ástand,“ sagði Barack Obama Bandaríkjaforseti um ástandið í Sýrlandi núna í samanburði við ástandið í Líbíu, þegar aðildarríki Atlantshafsbandalagsins ákváðu að hefja loftárásir til varnar almenningi þar á síðasta ári.

Valerie Amos, yfirmaður mannúðarstarfs Sameinuðu þjóðanna, kom í gær til borgarinnar Homs og fór meðal annars inn í hverfið Baba Amr, sem sýrlenski herinn hafði gert harðar árásir á vikum saman.

Hún sagði markmið heimsóknar sinnar til Baba Amr vera það að hvetja alla aðila til þess að veita hjálparstarfsfólki óhindraðan aðgang svo hægt verði að koma særðu fólki burt og koma nauðsynlegum hjálpargögnum á staðinn.

Átökin í Sýrlandi hafa harðnað jafnt og þétt síðustu vikur og engin lausn í sjónmáli. Assad forseti virðist staðráðinn í að berja niður uppreisnina, sem í staðinn magnast upp með hverri vikunni.- gb