Romney spáð velgengni áfram

Mitt Romney gerir sér vonir um að styrkja stöðu sína í forkosningum Repúblikanaflokksins enn frekar í dag, þegar kosið verður í tíu ríkjum samtímis.

Sérstaklega verður fylgst með árangri hans í Ohio, þar sem mjótt hefur verið á mununum milli hans og Ricks Santorum samkvæmt skoðanakönnunum.

Santorum er spáð sigri í þremur ríkjanna, en almennt virðast líkur á því að Romney nái góðum árangri.

Margir hægrisinnuðustu kjósendur Repúblikanaflokksins vantreysta Romney vegna tiltölulega hófsamrar afstöðu hans til fóstureyðinga, hjónavígslu samkynhneigðra og þátttöku ríkisins í heilbrigðisþjónustu.

Í forkosningunum í dag verður samtals 419 kjörmönnum úthlutað, eða meira en þriðjungi þess fjölda sem þarf til að hljóta útnefningu á flokksþingi Repúblikanaflokksins í lok ágúst. Samkvæmt talningu fréttastofunnar AP hefur Romney nú þegar tryggt sér 203 kjörmenn. Rick Santorum er kominn með 92 kjörmenn, Newt Gingrich 33 og Ron Paul 25.- gb