Tvær lestir mættust á teinunum

Að minnsta kosti sextán manns létust og nærri sextíu slösuðust, sumir lífshættulega, í versta lestarslysi sem orðið hefur í Póllandi í meira en tvo áratugi.

Orsök slyssins var sú að tvær lestir mættust á sömu lestarteinum og rákust á. Önnur lestanna var á rangri braut, en stuttu áður en slysið varð hafði verið unnið að viðhaldi á lestarteinunum.

Fremstu vagnarnir í hvorri lest voru gerónýtir og nokkrir vagnar ultu á hliðina við höggið.

„Ég rakst á manneskjuna fyrir framan mig. Ljósin slokknuðu. Allt fór á flug,“ sagði einn farþeganna, sem rætt var við á pólskri fréttastöð. „Við flugum eftir vagninum eins og töskur. Við heyrðum fólk öskra. Við báðum bænir.“

Slysið varð skammt frá bænum Szczechociny og þustu íbúar út til að hjálpa farþegum, sem sumir þurftu aðstoð við að komast út úr lestinni en aðrir stóðu ringlaðir með handfarangur fyrir utan.

„Þetta er afar sorglegur dagur og nótt í sögu pólsku járnbrautanna og fyrir okkur öll,“ sagði Donald Tusk, forsætisráðherra Póllands.- gb