Matarlaus í bíl í tvo mánuði í norður Svíþjóð

Sænskur maður sem fannst á föstudag eftir tveggja mánaða dvöl í bíl sínum án matar er á batavegi. Að sögn lækna er hann vakandi og fær um að eiga tjáskipti. Hitastigið utan við bílinn fór lægst niður í -30 gráður og telja læknar að snjórinn utan við bílinn hafi breytt honum í eins konar snjóhús og þar með komið í veg fyrir að maðurinn dæi úr kulda.

Maðurinn er talinn heita Peter Skyllberg og vera 44 ára gamall. Hann fannst nálægt bænum Umeå í Norðaustur-Svíþjóð á föstudag þegar vegfarendur á snjósleðum komu af tilviljun auga á bíl mannsins sem var umkringdur snjó.

Þurftu mennirnir að grafa sig í gegnum metra af snjó áður en þeir sáu Skyllberg liggja veikburða í aftursæti bílsins í svefnpoka. Að sögn lögreglu hafði maðurinn dvalið í bílnum frá 19. desember án annarrar næringar en snjós. Þá var hann varla fær um tala eða hreyfa sig þegar hann fannst.

Enn er óljóst hvernig það kom til að maðurinn festist í bíl sínum en vegnum sem bíllinn festist á er ekki haldið við.

- mþl