Átökin harðna dag frá degi

Sýrlandsher lagði til atlögu gegn borginni Daraa í Sýrlandi í gær, en þar í borg hófust mótmælin gegn Bashar al-Assad forseta í mars á síðasta ári.

Stjórnarandstæðingar segja hermenn hafa skotið af handahófi á fólk og handtekið marga. Aðgerðirnar í Daraa koma í framhaldi af árásum á borgirnar Homs og Hama og virðast liður í því að ráðast gegn helstu vígstöðvum uppreisnarmanna.

Hörð átök voru einnig í gær víðar í héraðinu Hama milli stjórnarhersins og liðhlaupa úr hernum, sem gengið hafa til liðs við uppreisnarmenn.

Bashar al-Assad forseti boðaði í vikunni þjóðaratkvæðagreiðslu um nýja stjórnarskrá. Vestrænir ráðamenn sögðu það loforð hlægilegt:

„Með þessu er verið að hæðast að sýrlensku byltingunni,“ sagði Jay Carney, talsmaður Baracks Obama Bandaríkjaforseta. „Til þessa hefur aukin grimmd venjulega fylgt loforðum um umbætur.“

„Hvernig getur hann komið með tillögu að þjóðaratkvæðagreiðslu,“ sagði Alain Juppe, utanríkisráðherra Frakklands, „meðan haldið er áfram að skjóta úr fallbyssum á saklausan almenning í miðborgum sumra sýrlenskra borga?“- gb