Glæpir framdir gegn mannkyni

Navi Pillay, mannréttindafulltrúi Sameinuðu þjóðanna, segir að Sýrlandsstjórn virðist notfæra sér óeiningu í öryggisráði Sameinuðu þjóðanna til þess að herða aðgerðir sínar gegn mótmælendum um allan helming.

Hún segir útilokað að gefa nákvæmar tölur um mannfall, en á síðasta ári hafi stjórnarherinn drepið meira en 5.400 manns frá því mótmæli gegn stjórninni hófust í mars. Mannfallið hafi síðan haldið áfram.

Hún fordæmir framferði stjórnarhersins og segir flest benda til þess að sýrlenska stjórnin hafi framið glæpi gegn mannkyni alveg frá því uppreisnin hófst.

Mannréttindasamtök hafa fullyrt að aðgerðir stjórnarinnar hafi kostað meira en sjö þúsund manns lífið síðustu ellefu mánuðina.

Árásir á borgina Homs hafa staðið yfir nánast samfleytt í hálfa aðra viku. Í gær tókst uppreisnarmönnum hins vegar að hrinda árásum stjórnarhersins á borgina Rastan, sem þeir hafa haft á sínu valdi síðan seint í janúar.

Sýrlandsstjórn hefur hafnað áætlun Arababandalagsins um að senda með Sameinuðu þjóðunum sameiginlegan friðargæsluher til Sýrlands. Rússar hafa einnig hafnað þessum áformum, en segja að takist fyrst að semja um vopnahlé milli stjórnar og uppreisnarmanna þá komi til greina að senda friðargæslusveitir til landsins.- gb