Hefur aldrei verið ákærður

Abu Qatada, rúmlega fimmtugur íslamskur predikari, var í gær látinn laus í Bretlandi eftir áratug í fangelsi. Hann þurfti þó að reiða fram tryggingarfé og þarf að sæta eftirliti, að öllum líkindum með útivistarbanni og ökklabandi til öryggis.

Bresk stjórnvöld segja hann einn helsta leiðtoga hryðjuverkasamtakanna Al Kaída í Evrópu. Hann hafi á sínum tíma verið í nánum tengslum við Osama bin Laden.

Abu Qatada, sem heitir raunar Omar Mahmoud Mohammed Othman, var handtekinn árið 2002 vegna gruns um aðild að hryðjuverkum. Hann hefur þó aldrei verið ákærður fyrir neitt í Bretlandi, en var orðinn þekktur í landinu fyrir ofstækiskenndar ræður sínar.

Bretar vildu framselja hann til Jórdaníu, þar sem hann á yfir höfði sér málaferli vegna hryðjuverka. Mannréttindadómstóll Evrópu komst hins vegar að þeirri niðurstöðu í síðustu viku að ekki megi framselja hann þangað, því hætta sé á að upplýsingar fengnar með pyntingum yrðu notaðar gegn honum við réttahöldin.

Bresk stjórnvöld sögðust þó ekki búin að gefa upp á bátinn alla von um að geta komið honum úr landi.

„Við erum með það á hreinu að við viljum fá Abu Qatada burt sem fyrst. Við erum að kanna alla möguleika,“ sagði talsmaður Davids Cameron forsætisráðherra við fréttastofuna AP.- gb