Á annað hundrað látnir í frosti

Vetrarhörkurnar í Evrópu síðustu daga hafa kostað hátt á annað hundrað manns lífið. Síðast í gær létust að minnsta kosti tuttugu manns í Úkraínu, níu í Póllandi, átta í Rúmeníu, einn í Serbíu og einn í Tékklandi.

Ástandið hefur verið verst í austanverðri álfunni, en hörkurnar hafa einnig verið miklar í Þýskalandi, Frakklandi, Miðjarðarhafslöndum og norðanverðri álfunni. Í þorpum fjallahéraðs í Serbíu hafa að minnsta kosti 11 þúsund manns verið innilokaðir vegna fannfergis, hálku og hríðarveðurs sem staðið hefur dögum saman. Sams konar veðri er spáð þar áfram næstu dagana og var því mikil áhersla lögð á að opna vegi í gær, meðan færi gafst.

Í Úkraínu hafa meira en 60 manns látist vegna kuldanna undanfarna viku. Hátt í þúsund manns hafa verið lagðir inn á sjúkrahús vegna ofkælingar og kals. Þá hafa stjórnvöld sett upp upphituð tjöld þar sem heimilislausu fólki er boðið upp á heitan mat og skjól.

Í Rúmeníu hafa meira en tuttugu manns látist og þar hefur um 180 skólum verið lokað vegna veðursins. Þá sitja þrjú skip föst í ísnum á Dóná. Í Búlgaríu eru rúmlega þúsund skólar lokaðir. Nokkrir bæir þar eru rafmagnslausir og er unnið dag og nótt að því að koma rafmagni á aftur.

gudsteinn@frettabladid.is