Í fangelsi fyrir bílastæðabrot

Bílastæðayfirvöld í Kaupmannahöfn og samtök fatlaðra hafa tekið höndum saman til að koma í veg fyrir misnotkun á bílastæðum fyrir fatlaða. Þetta kemur fram hjá danska ríkisútvarpinu. Mögulegt er að þeir sem leggja ólöglega í slík stæði verði dæmdir í fangelsi.

Borið hefur á því að ökumenn noti fölsuð, stolin eða útrunnin merki í bíla sína til þess að fá að leggja í stæði merkt fötluðum. Fjórtán slík tilvik hafa komið upp það sem af er ári, en talið er að það sé mjög lítill hluti heildarinnar. Ný tækni gerir stöðumælavörðum kleift að athuga strax hvort merki í bílunum séu lögleg. - þeb