Vampíra á kreiki í Serbíu

Íbúar í litlu þorpi í vesturhluta Serbíu hafa hamstrað hvítlauk síðustu daga. Bæjarstjórn Zarozje-þorpsins gaf út tilkynningu á dögunum þess efnis að vampíra væri mögulega á kreiki á svæðinu.

Tilkynningin barst eftir að gömul kornmylla hrundi til grunna skammt á frá þorpinu. Eftir því sem þjóðsögur herma bjó ein elsta og frægasta vampíra Serbíu í myllunni.

Sava Savanovic var uppi á átjándu öld. Árum saman hafði hann aðsetur í myllunni. Þegar nokkrir kornbændur á svæðinu hurfu sporlaust beindust sjónir fljótt að Sava. Grunur lék á að hann hefði ráðist á bændurnar og drukkið blóð þeirra.

Upp frá þessu hefur myllan verið sveipuð dulúð. Bændur hættu brátt að mylja korn sitt í myllunni enda voru þeir handvissir um að Sava myndi svipta þá sálinni.

Í samtali við fjölmiðla í Serbíu sagði bæjarstjórinn í Zarozje, Miodrag Vujetic, að íbúar í þorpinu væru sannarlega áhyggjufullir.

„Allir þekkja þessa sögu," sagði Vujetic. „Og tilhugsunin um að Sava sé nú heimilislaus og á flandri, leitandi að fórnarlömbum, er hræðileg. Við erum öll óttaslegin."