Allt að 50.000 ólöglegir innflytjendur í Danmörku

Danska lögreglan telur að allt að 50.000 ólöglegir innflytjendur séu í Danmörku, það er fólk sem komið hefur til landsins á fölskum skilríkjum.

Í dönskum fjölmiðlum kemur fram að lögreglan telur að á bilinu 20 til 50 þúsund manns séu ólöglega í landinu en lögreglan segir að hér sé um mat sitt að ræða þar sem engar áreiðanlegar opinberar upplýsingar séu til um fjölda þessa fólks í landinu. Vandamálið sé hinsvegar umfangsmikið.

Auðvelt er að afla sér falsaðra skilríkja í Evrópu. Fyrir 2.000 evrur er hægt að kaupa sér á netinu pakka með fölsuðum skilríkjum sem inniheldur bæði vegabréf og ökuskírteini.