Kim Jong-Un sagður kynþokkafyllsti maður heims

Málgagn Kommúnistaflokksins í Kína sagði frá því í dag að leiðtogi Norður-Kóreu, Kim Jong-Un, væri kynþokkafyllsti núlifandi maður heims. Þessi undarlegi fréttaflutningur virðist hins vegar byggður á neyðarlegum misskilningi.

Vefsíða The People's Daily birti í dag tvær málsgreinar um Kim Jong-Un ásamt 55 myndum af leiðtoganum unga. Þar kom fram að hann væri hreint út sagt draumur allra kvenna með sitt „óhugnalega myndarlega, kringlótta andlit, strákslegan sjarma og boltalaga sköpulag".

Málsgreinarnar voru hins vegar teknar orðrétt upp af bandarísku síðunni The Onion, sem er grínsíða sem segir platfréttir. Kínverska málgagnið minntist þó ekkert á kaldhæðni þegar það vísaði á „fréttaveituna The Onion" og tók tíðindunum augljóslega sem blákaldri staðreynd. Fréttirnar birtust bæði á kínversku og ensku á vefsíðu málgagns Kommúnistaflokksins.

Kim Jong-Un var sagður gera útaf við fréttastofur með óaðfinnanlegri tískuvitund, töff klippingu og auðvitað hinu víðfræga brosi.

Eins og kunnugt er eru Kínverjar eini raunverulegi bandamaður Norður-Kóreu, en landið er afar illa statt vegna fátæktar.

Hér er sagt frá þessum misskilningi.