Breskir hermenn myrtir í Afganistan

Tveir breskir hermenn voru skotnir til bana í suðurhluta Afganistan í dag. Samkvæmt Philip Hammond, varnarmálaráðherra Bretlands, var vígamaðurinn klæddur einkennisbúningi afganska hersins.

Skotárásin átti sér stað við alþjóðlega herstöð við borgina Lashkar í Helmand-héraði.

Talsmaður Atlantshafsbandalagsins segir að vígamaðurinn hafi verið felldur af hermönnum.

Grunur leikur á að ódæðið sé hefndarverk vegna fjöldamorðsins sem átti sér stað í suðurhluta Afganistan fyrr í mánuðinum. Þá myrti bandarískur hermaður 17 óbreytta borgara.

Hermaðurinn hefur verið ákærður vegna fjöldamorðanna og á yfir höfði sér dauðadóm vegna þeirra.