300 þúsund leituðu hælis í ESB-ríkjum

Hælisleitendum fjölgaði í Evrópusambandsríkjum í fyrra miðað við árið áður. 301 þúsund manns leituðu hælis í fyrra en 259 þúsund árið 2010. Þetta kemur fram í tölum Eurostat, hagstofu Evrópusambandsins.

Níu prósent hælisleitenda komu frá Afganistan, eða 28 þúsund manns. Þá komu átján þúsund frá Rússlandi, tæplega sextán þúsund frá Pakistan, rúmlega fimmtán prósent frá Írak og fjórtán þúsund frá Serbíu.

Samkvæmt mati Eurostat voru níu af hverjum tíu hælisleitendum að sækja um hæli í fyrsta sinn en einn af hverjum tíu hafði sótt um áður. Í fyrra voru teknar ákvarðanir í málum 237.400 hælisleitenda en margir þeirra hælisleitenda höfðu sótt um hæli fyrr.

Þremur af hverjum fjórum umsóknum var hafnað, eða 178 þúsund. 29 þúsund fengu stöðu sína sem flóttamanns staðfesta og 21.400 stöðu flóttamanns með þörf fyrir viðbótarvernd. Rúmlega níu þúsund manns fengu dvalarleyfi á grundvelli mannúðarsjónarmiða.

Ríflega níutíu prósent allra hælisleitendanna komu til tíu ríkja innan ESB. Langflestir sóttu um hæli í Frakklandi og Þýskalandi, 56 og 53 þúsund manns. Þá sóttu 34 þúsund manns um hæli á Ítalíu og 32 þúsund í Belgíu. Hælisleitendur í Svíþjóð voru tæplega þrjátíu þúsund og 26 þúsund í Bretlandi. Ríflega fjórtán þúsund hælisleitendur komu til bæði Hollands og Austurríkis í fyrra á meðan níu þúsund sóttu um hæli í Grikklandi og sjö þúsund í Póllandi.

Fæstir leituðu hælis í Eistlandi, eða 65 manns. Þá leituðu 275 til Portúgal, 340 til Lettlands, 360 til Slóveníu og 490 til Slóvakíu.

thorunn@frettabladid.is