Berlusconi er kominn með nóg

Silvio Berlusconi ætlar ekki að sækjast eftir forsætisráðherraembættinu þegar Ítalir kjósa á næsta ári. Þetta staðfesti hann í dag. Berlusconi sagði að hér eftir yrði það hlutverk hans að styðja við bakið á ungu fólki sem geti skipt sköpum í stjórnmálum.

Berlusconi var forsætisráðherra á síðasta ári en sagði af sér embætti eftir að hrina hneykslismála hafði skekið embættið. Við embættinu tók Mario Monti sem ætlar ekki að gegna því lengur en fram að næstu kosningum. Líklegt þykir að Angelino Alfano, fyrrverandi dómsmálaráðherra, muni taka við formennsku í flokki Berlusconis.

Berlusconi hefur þrisvar sinnum gegnt embætti forsætisráðherra. Það var 1994-1996, 2001-2006 og aftur 2008-2011, eins og segir á vef danska ríkisútvarpsins.