Sá sem skipulagði skotárásina á Malala nafngreindur

Bandaríska fréttastofan CBS greinir frá því í dag að pakistönsk yfirvöld hafa tæplega tvítugan karlmann grunaðann um að hafa skipulagt fólskulega skotárás á hina fjórtán ára gömlu Malala Yousufzai sem var skotin margsinnis í byrjun október.

Sá sem er grunaður heitir Ataullah Khan og var sjálfur háskólanemi í Pakistan. Unglingsstúlkan var skotin vegna þess að hún barðist fyrir réttindum kvenna, og sagði meðal annars að mikilvægasta leiðin til þess að öðlast réttindi væri menntun.

Malala er nú í umsjá breskra lækna í Birmingham þar sem hún er á hægum en öruggum batavegi. Foreldrar hennar eru aftur á móti enn í Pakistan, en ástæðan mun vera sú að stjórnvöld þar í landi báðu þau um að vera eftir til þess að aðstoða við rannsóknina.

Nú þegar hafa nánustu ættingjar Khan verið handteknir, þar á meðal móðir hans.

Málið hefur vakið gríðarleg viðbrögð um heim allan og beint sjónum að óforskömmuðum aðferðum Talíbana sem er reiðubúnir að skjóta unglingsstúlkur vegna skoðana þeirra. Enn er leitað að Khan sem er talinn hafa farið til Afganistan í felur.