Neymar í peningavandræðum þrátt fyrir háar tekjur

Brasilíski knattspyrnumaðurinn Neymar er gríðarlega eftirsóttur enda er hinn tvítugi framherji eitt mesta efni sem komið hefur fram á síðari árum í Brasilíu. Neymar leikur með Santos í heimalandi sínu og lifir þægilegu lífi en samkvæmt grein sem birt var á vef Forbes virðist Neymar ekki hafa góða yfirsýn yfir útgjöld og tekjur.

Brasilíumenn vonast til þess að Neymar beri landsliðs þeirra á herðum sér þegar HM fer fram í Brasilíu árið 2014. Goðsögnin Pele hefur lýst hinum tvítuga Neymar sem töframanni með galdrafætur.

Neymar er að mati Forbes með um einn milljarð kr. í árstekjur og svo virðist sem hann sé í peningavandræðum þrátt fyrir gríðarlegar tekjur. Á undanförnum tveimur árum hefur Neymar keypt þrjár fasteignir í Sao Paulo fyrir um 400 milljónir kr. Bifreið hans, Porsche Panamera, kostaði um 70 milljónir kr. Hann gaf barnsmóður sinni, sem er 18 ára gömul, íbúð í Santos sem metin er um 130 milljónir kr., og hann greiðir um 2 milljónir kr. í meðlög með barninu.

Svo virðist sem kaup Neymar á notaðri ítalskri snekkju hafi sett heimilisbókhaldið úr skorðum. Heildarkostnaður við kaupin, breytingar og viðhald á snekkjunni er nú þegar komin í einn milljarð kr. eða sem nemur heildarárslaunum kappans.

Neymar fær um 4 milljónir bandaríkjadala í árslaun hjá Santos eða sem nemur um 500 milljónum kr. Hann er einnig með samninga við ýmis fyrirtæki og þar má nefna Nike og Red Bull.