Gallabuxur með innbyggðu lyklaborði væntanlegar

Hollenskir uppfinningamenn hafa þróað gallabuxur með innbyggðu lyklaborði. Einnig verður hægt að fá sérstaka útgáfu sem kemur með tölvumús og hátölurum.

Gallabuxurnar eru kallaðar „Fríða og lúðinn."

Það voru uppfinningamennirnir Erik de Nijs og Tim Smit sem hönnuðu buxurnar. Þeir segja að buxurnar séu hannaðar fyrir þá sem vilja nota fartölvur sínar hvar sem er og hvenær sem er.

Jaðartækin tengjast tölvunni með þráðlausri tækni.

„Hugmyndin var sú að maður geti tengst tölvunni og stjórnað henni hvar sem er og þannig komast hjá því að sitja í tölvuveri," sagði de Nijs.

„Buxurnar eru ekki þungar. Lyklaborðið sveigjanlegt, hátalarnir eru litlir og músin passar fullkomlega í rassvasann."

Gallabuxurnar koma til með að kosta 250 pund eða um 50.000 krónur.