Curiosity biður fólk um að róa sig

Vitjeppinn Curiosity hefur biðlað til fólks um halda ró sinni vegna væntanlegra tíðinda frá vísindamönnum NASA. Fyrr í vikunni greindi bandaríski fjölmiðillinn NPR frá því að tíðindin yrðu söguleg.

Síðan þá hefur þrálátur orðrómur verið á kreiki um að Curiosity hefði fundið lífrænar sameindir á Mars. Svo virðist ekki vera.

Í skilaboðum sem birtust undir notendanafni Curiosity á samskiptamiðlinum Twitter kom fram að engar vísbendingar um líf hefðu fundist á rauðu plánetunni.

Talsmaður NASA sagði fjölmiðlum í gær að geimferðastofnunin myndi halda blaðamannafund á næstu dögum þar sem nýlegar niðurstöður úr vettvangsrannsóknum Curiosity yrðu kynntar. Það væri hins vegar af og frá að þessar upplýsingar væru sögulegar.

Curiosity hefur því beðið fólk um að halda ró sinni. Enn fremur vildi þetta vinalega geimfar koma þeim upplýsingum áleiðis að aðeins væru nokkrir mánuðir liðnir af verkefninu.